शाह लोग जीजा-साली के चुटकुल्या पै पाट-पाट के हांसै सै।
अर पुलवामा म्है, वे हमने काट-काट के हाँसै सै।

बेरा नी बदला ल्योगे अक बस झूठे दिलासे होंगे।
पर बैरी तै म्हारा खून बहाके डीजे ला लाके नाचे होंगे।

थाम तै नाचे-कूदे, वैलेंटाइन मनाया अर सोगे।
ओहडे दनादन गोली चाली अर भारत माँ के चालीस सपूत खोगे।

रै पूछदी होगी वा माँ भी, थाम थारे भाइयां का बदला कद ल्योगे।
अर म्हारे टुकड़े करण आला के सिर कद लग काट दयोगे।

एक-एक करकै भारत माँ के शेर कम होंदे जा सै।
थारी आंख्या का बेरा नी पर उसके पत्ते-पत्ते नम होंदे जा सै।

जै न्यूए रह्या तै आडै बस नल्ले रह ज्यांगे।
घटिया राजनीति के टोटरू अर दल्ले रह ज्यांगे।

जै थारे तै कुछ ना बनदा हो तै म्हारे पै छोड़ दयो।
अर इन ऑर्डरां आली जंजीरा नै एक बै तोड़ दयो।

बाप-बाप हो सै अर बेटा-बेटा, उसनै सीखा दयांगे।
हमनै एक बै छूट तो दयो, साळ्यां के होश ठिकाने ला दयांगे ।

मौका दयो तै पाकिस्तान का कब्रिस्तान बना दयांगे।
अर बस दो घण्टा म्है लाहौर तिरंगा फहरा दयांगे।

मिंटा के हिसाब तै इतिहास उलट ज्यागा।
म्है रलकै पाकिस्तान का किस्सा पलट ज्यागा।

देके तै देख 'जय', रै मौका देन म्है के हर्ज सै।
रै भारत माँ के वीरां खातर थारा भी तै किमे फ़र्ज़ सै।
किमे अपना भी तो फ़र्ज़ सै..........

©®विजय खनगवाल